Z mojih ukohanyh Uogewnik S’loonskih niyrod wyjyrzdrzom. A wcale poza S’loonsk.
Hoc’ niy powiym, troha rzeh sie w rzyciu narajzowou. Nawet za granica.

Za modu rajzowou rzeh po Zaolziu z choorym dzieciyncym, potym troha po Demoludah, cytej: Czehy i DDR - na sztympel w dowodzie, Bougario, Zwionzek Radziecki - flugami
i cugami przyjaz’ni, a wuas’ciwie Ukraina, Uzbekistan, Azerbejdrzan i Gruzjo.
No i nojdukszo sztreka - do Japonji - przez Ymiraty Arabske, Bangkok, Bombaj i Manilio.

Wtedy to rajzowanie mie bawiouo i interesowauo.
A teroski, korzdo hwila spyndzono kaj indzi nirz w mojih ukohanyh Uogewnikah S’loonskih
mie myncy i ledwo wyjada, zacyno mi sie cnic’ bez nih i cos’ mie zacyno ciongnon’c’ nazod do dom.
Morze jest to przykuad na materializowanie sie zasady: wszyndzie dobrze, ale nojlepi
w doma ?!

Dziwi mie tyrz hyn’c’ do jerzdrzynio po s’wiecie u mojego synka. Ale morze to jest ino
„powtoorka z rozrywki” w wykonaniu mojego „nastympcy tronu”?
Musza przyznac’ rze jurz mie wzion w tyj rywalizacji, a hyba i zdublowou, bo zaliczou wiyncy miejsc na s’wiecie, z Chinami wuoncznie, nirz jo.

Za to bardzo jest rzeh rod jak ftos’ do mie przyjyrzdrzo.

I stauo sie !

Do Uogewnik S’loonskih zawitaua Bolivio! Bolivio, w osobie mojego kuzyna Antona,
kery teroski, jurz jako braciszek, przywdziou miano - Bonifacy.

Kedys’ to sie przedrzyz’niauo: Bonifacy, buh po glacy!

Glaca, jak przystauo na franciszkanina, mo coroz wyraz’niejszo.

Wiwat Anton, witej Bonifacy, VIVA BOLIVIA, wiwat Pouudniowo Hameryka!

Uosprowki niy bouo kon’ca, mimo rze wpod na krootko.
Ale trza Go bouo zrozumiec’, rze jak przyjedzie co pora lot, to hciouby wszystkih
uodwiedzic’.

Widza rze Uon dostrzego wiela dziynki uoddalyniu.
Mo hyba lepszo perspektywa.
Zaroski zapowiedziou rze niy bydzie piou Coca-Coli, po tym jak sie przekonou, co
robi tyn koncern z tymi, kerzy niy som mu posuuszni.

Jo mys’la rze niyposuusznyh rzodyn niy umi s’ciyrpiec’, a noj mniyj ci, co majom
wuadza polityczno abo gospodarczo, czyli - rzondzoncy.

Wspominali my dzieciynce casy, te nasze wspoolne zabawy i psoty, co nos zwionzauy na
zowdy. Te moje msze z Jego ministrantowaniym, uo keryh Uon mys’li, rze bouy jakoms’
dziecinnom, ftedy jeszcze niywinnom inspiracjom, ku drodze kero uobrou.

Ale bouy i tymaty bardzo warzne i powarzne, mys’li peune zatroskanio uo S’loonsk i Norood. A morze i refleksjo nad stanym, kery zastowo Uon u nos, bo pedziou, rze na staros’c’ to hyba przydzie Mu ewangelizowac’ swoja wuasno Uojczyzna i Uojcowizna.

Cy by jurz bouo tak z’le?

Na przykuadzie mojih ukohanyh Uogewnik S’loonskih, a i wspomnianyh w uostatniym beraniu Lipin czy Bobrka, kaj iber zwanzig jahren rzeh fedrowou na Juliahiitte, a bezto
zrzou sie z niyjednym, kery tam tyrz robiou, abo miyszkou, musza pedziec’ rze -
Uon mo reht!.

Wielu sie z tyh miejsc wyniosuo, pociepuo swoja Uojcowizna, abo wnerwiyni, abo
uopuszczyni, abo bezsilni wobec przeciwnos’ci, z kerymi sie spotykali, z kerymi niy umieli
sie poradzic’, abo z kerymi jurz niy hcieli sie bic’.
Bo jak dugo idzie?

Szukali szczyn’s’cio kaj indzi, niyroz daleko, a nawet bardzo daleko, bo u siebie -
NIY WIDZIELI NADZIEJE ! A u staryh, resztki siyu. Tyla coby dorzyc’ do kon’ca.

I tak te kolejne pokolynia, kere tam nazywano auslynderami, uodhodziouy.
Czyn’s’c’ uodeszua na miejscu, na wieczno warta.
Ziymia Naszo bez Nih jauowiaua, rzetelne rzymiosuo zanikauo, abo bouo niyuopuacalne,
dobre wzorce ludzkih postaw i dobro robota stowauy sie niymodne, abo niybezpieczne, robotni woleli wyjehac’, szli na swoje i uostowaua - BEZNADZIEJA.

Reszcie pomogli sprzedawczyki, kerym zowdy mauo.

W tyh wspomnianyh miejscah uobroski jak z przedmies’c’ pouudniowohamerykan’skih metropolji, abo hamerykan’skih filmoow, na keryh tako samo hamerykan’sko beznadzieja,
nojczyn’s’ciyj kolorowo, z wuasnego wyboru, abo niy zawiniono, ale bezsilno, koczuje po slamsah.

Te same uobroski som teroski u nos.

I niy dziwi zdziwiynie Antona - Bonifacego, kedy na to patrzi i to uoglondo, co jakis’ szas,
a co jeszcze tak niydowno bouo rzywe, us’miyhniynte, pracowite i czyste.

Ale morze pyjdzie uodsiecz, na razie „dyplomatyczno”, z Ministerstwa Spraw Zagranicznych?

Bo zapowiedziou sie przedstawiciel JuEsEj!

Rostomiyuy Tadzik!

Wiwat Tadzik, witej MSZ, VIVA USA, witej Puunocno Hameryko!

Zapytomy Cie: FTO JE NASZYM MINISTRYM GOSPODARKI ? Jaki mo plan ?

Bo to przeca czas przedwybiorczy !

CEKOMY !