W mojih ukohanyh Uogewnikah S’loonskih do niydowna jeszcze bou w urzyciu instrumynt kery się nazywo szauamaja.
Instrumynt bardzo ciekawy i teroski jurz hyba caukym zapomniany.

Grali na niym muzykanty z dyntyj uorkestry kopalni Uogewniki.
Wielke zaciekawiynie powodowali uoni grom na tyh tak rzodko spotykanyh insztrumyntah.
Bouy uone jurz blaszane, hoc’ ih historyczny poprzednik bou insztrumyntym drzewnianym.

A pohodzynie miou azjatycke i piyrwotnie bou piszczoukom z bocznymi uotworami
i podwoojnym stroikym. I to go przedewszystkym wyroorzniauo.

Uod niego się wywioduy nastympnie obooj i klarnyta.

Niymce na nie godali Schalmei, skirz tego hyba rze po francusku nazywauo sie je chaumeau, po starofrancusku pisaou sie chalemie, po uocinie calamus, a nojwczes’niyj nazwa wziynua sie poonoc’ z greckego kalamatos, co znaczy - trzcinowy.
S’cic’ piyrsze z nih bouy robione jako piszczouki ze trzciny.

Te insztrumynty wielodz’wiynkowe, cego jednak niy umia udowodnic’, moguy byc’ inspiracjom dlo uodkrywcy „dz’wiynkoow kombinowanyh” - Witolda Szalonka,
wielodz’wiynkoow uzyskiwanyh na dyntyh insztrumyntah drzewianyh, tak harakterystycznyh pod wzglyndym barwy.

Witold Szalonek bou przeca mocno zwionzany z naszymi ukohanymi Uogewnikami.
Niy ino przez to rze miou tu rodzina i rze na dom kultury kopalni Uogewniki godauo
się - „U Szalonka”.

Bou Uon naszym parafijaninym. I nigdy uo tym i uoo nos niy zapomniou.

Uo Jego przywionzaniu do naszyj parafie niyh s’wiadczy to, rze tyn s’wiatowyj suawy
kompozytor i pianista skoompoonowou specjalnie na 100-lecie parafie i kos’cioua
„Trzy Hymny do S’wiyntego Jana Nepomucena” uods’piywane przez nasz hoor parafialny S’wiyntyj Cecylije.

Ih prawykonanie uodbouo sie w czasie Niyszporoow S’wiątecznyh w Jubileuszowy Uodpust
19 maja 1996 toku.

Inny utwoor - „Pozdrowiyna” - Witolda Szalonka i wspomniane „Trzy Hymny” bouy
w programie Koncertu Jubileuszowego 21 listopada 1999 roku z okazje 75-lecio Hooru
Parafialnego pod wezwaniym S’wiyntyj Cecylije.

Korzdo Jego bytnos’c’ na S’loonsku, nie mogua uominon’c’ Jego ukohanyh Uogewnik S’loonskih, downyj parafie.
Jeszcze mom w uszah „Piyrwotne dz’wiynki”, kere nom uodtwarzou i na tymat keryh dou nom niy tak downo jeszcvze wykuad w naszym kos’ciele.

Bou Uon przedstawicielym nurtu awangardowego w muzyce.

Jednom z barzij kolorowyh postacioow naszyj muzyki.

Wielkym przyjocielym niyszablonowo guoowkujoncyj, twoorczyj muodzierzy.

Wykuadowca i profesor Pan’stwowyj Wyrzszyj Szkouy Muzycznyj w Katowicach
i berlin’skiyj Hochschule der Kiinste.

Twoorca i kompozytor, kerego utwory typowane bouy i wykonywane na festiwalah
muzyki wspoouczesnyj uorganizowanyh przez nojrozleglejsze bez wontpiynio Miyndzynarodowe Towarzystwo Muzyki Wspoouczesnyj.

Po 1945 roku wykonywane bouy tam kompozycje Artura Malawskiego, Andrzeja
Panufnika, Tadeusza Bairda, Henryka G�reckiego, Bogusława Schaeffera, Krzysztofa
Pendereckiego i WITOLDA SZALONKA.

Niy bou Uon piyrszym naszym twoorcom, barzij podziwianym i szanowanym poza Polskom!

Pisza uo NIYM w czasie przeszuym, bo doszua nos smutno wies’c’ uo Jego s’mierci.

Zgasuo muzyczne „Lux ex Silesia”.

I hoc’ mo UON swoje trwaue miejsce wedle alfabetu przed szauamajami w korzdyj Encyklopedji Powszehnyj i Encyklopedji Muzyki, to tak po prowdzie powinne uone być’ tym razym przed NIYM i is’c’ z dyntom muorkestrom.